حوار مع فيروس انفلونزا الطيور

الفيروس يصرح : جربت أدخل جسم مواطن مصري!

تفاصيل المباحثات المشتركة مع الميكروبات المصرية !

إذا فتحت أي جريدة أو مجلة أو قناة تلفزيونية أو إذاعية أو أي وسيلة إعلام مسموعة أو مقروءة , ستجد أن الجميع يتكلم في موضوع واحد هو : أنفلونزا الطيور.. أتعجب في سري من هذا الاهتمام غير العادي .. هم الطيور دول كانوا من بقيت أهالينا يعني ؟؟

الصحفي المصري قال:
لسبب ما أردت أن أكتب عن هذا الموضوع.. و لسبب ما أردت أن يكون الموضوع مختلفا.. الكل كتب عن أنفلونزا الطيور.. ايه الجديد اللي ممكن اكتبه ؟؟

فكرت مليا في الموضوع و توصلت للفكرة التي قرأتها أنت للتو في العنوان.. ليه لأ ؟؟ مانستضيف الفيروس نفسه و نعمل معاه حوار.. مش اشتغالة بقى ؟؟ محدش عملها قبل كده و أهو يبقى انفراد.. " الصحفي ده متميز زي كده اللهم لا غرور "

لن أحكي لكم عن مغامراتي المستميته في تحديد موعد مع هذا الفيروس المشغول جدا.. لكن يكفي أن أقول أنني استطعت أن أصل إليه بطريقة ما و أجريت معه هذا الحوار الممتع و المتميز جدا..
انا بقى جبتلكم الحوار كامل وحصريا على منتدانا
اتفضلو
اسمعوا وعوا

الصحفي: اهلا و سهلا يا عم الفيروس

الفيروس: اهلا اهلا ...

الصحفي: لو سمحت ياريت تعرف اخوانا القراء بنفسك..

الفيروس: اسمي في البطاقة h5 .. و اسمي الفني ( فيروس انفلونزا الطيور)..

الصحفي: ما هو محل الاقامة ؟

الفيروس: محل الاقامة مش ثابت للأسف.. اصلي غاوي سفر بيني و بينك..

الصحفي : طيب ما هو محل الميلاد ؟

الفيروس: أنا اتولدت أساسا في جنوب شرق آسيا.. قول في الصين كده..

الصحفي: كلمنا عن نفسك شوية..

الفيروس: أنا فيروس عادي زي أي فيروس في الساحة الطبية.. بس كل ما هنالك إني وجه جديد و انت عارف بقى وسائل الاعلام بتهتم بكل ما هو جديد..

الصحفي: إيه الجديد اللي قدمته ؟

الفيروس: يمكن الجديد إني غاوي فراخ و بط و وز..و شهيتي مفتوحة حبتين .. بس كده..

الصحفي: طيب إيه اللي جابك عندنا يا استاذ h5 ؟

الفيروس: أبدا.. لقيت كل حاجه بتجيلكم من الصين و انتم فرحانين بيها.. فقلت آجي أنا يمكن ترحبوا بيا أنا كمان !

الصحفي : نرحب بيك ؟ يعني جاي تخرب بيتنا و نرحب بيك ؟؟ تيجي ازاي دي ؟

الفيروس: يا بيه مالبضايع اللي جايالكم من الصين جايه تخرب بيتكم هيا كمان, و فرحانين بيها و طايرين بيها.. اشمعنه انا يعني ؟؟

الصحفي: مش واخد بالي ..

الفيروس: اسمع يا سيدي.. البضايع الصيني دي مش جاية تضرب الصناعة و الاقتصاد المصري ؟

الصحفي : بيحصل !

الفيروس : أنا كمان جاي أضرب الفراخ و الاقتصاد المصري.. هي هي يعني !!

الصحفي : دانت فيروس مثقف قوي.. طيب بلاش كلام في السياسة عشان الناس ماتزهقش..

الفيروس: زي ما تحب..

الصحفي : انت ازاي دخلت الأراضي المصرية ؟

الفيروس : بلاش كلام في النقطة دي لو سمحت.. أنا متسلل صحيح بس مش عايز مشاكل مع الداخلية الله يخليك..

الصحفي : يعني دخلت ازاي ؟

الفيروس: دخلت مع بطة مهاجرة وصلتني في طريقها .. أوتو ستوب يعني !

الصحفي: و ناوي تعمل ايه في مصر ؟

الفيروس : أبدا.. أنا باتكاثر على البط و الوز و الفراخ و الطيور الظريفة دي..

الصحفي : طيب مش ناوي تنتقل للبني ادمين ؟

الفيروس : لا طبعا .. rendeer

الصحفي : ليه ؟

الفيروس: شوف يا بيه .. احنا الفيروسات غاويين أذية صحيح , لكن مابنحبش نقطّع على بعض .. كلام في سرك كده .. أنا جربت أدخل جسم مواطن مصري.. لقيت لما دخلت لقيت زملاء كتير قوي .. (التهاب كبدي و بائي) على (بلهارسيا) على (التهاب سحائي) على (سرطان) على (سالمونيللا).. لقيت خلق كتير قوي يا بيه.. لقوني داخل عليهم قاموا وقفوا.. و خدوني على جنب.. و رنوني حتة علقة مَكن ,خلتني أزرقّ..!! شايف البشلة اللي في وشي دي ؟؟ إهي دي ضربة مطوة من الأخ (فشل كلوي) !

الصحفي : و بعدين ؟؟

الفيروس : أبدا.. بعد ما خدت العلقة التمام, قعدنا قعدة عرب.. و اتكلمنا كلام فيروسات من الآخر و اتفقنا على المفيد..

الصحفي: اتفقتوا على ايه بالضبط ؟

الفيروس: اتفقنا على إن انا مش من هنا و مش ابن بلد فلازم ألتزم بالأصول ..و ما قطّعش على الميكروبات المصرية الصميمة.. اتفقنا على قاعدة ( صباح الخير يا جاري ,انت في حالك و انا في حالي!) يعني بلاش تقطيع على بعض و خليني في الفراخ و العصافير و ما أهوبش ناحية منطقة الميكروبات التانية.. أصلها أرزاق يا بيه و غلط ناخد رزق بعض عدم المؤاخذة..و ده اللي أعلنا عنه في المؤتمر الصحفي بعد المباحثات اللي اجريناها مع بعض في أحد مقالب الزبالة..

الصحفي: تشرفنا بلقاءك يا سيد h5

الفيروس: الشرف ليا يا بيه.. و أنا سعيد إني أول فيروس تعملوا معاه حوار في روايتي..

الصحفي : نورت المحكمة..

الفيروس : دا نورك يا بيه..

حكمة اليوم:

‘ ما طار طير و ارتفع إلا كما طار وقع..’

شفت أنفلونزا الطيور و عمايلها ؟ bounce

ههههههههههههههههههههه

شكرا لك